ಮಕ್ಕಳು ಹಾಕಿದ “ಒಗ್ಗರಣೆ!?”
ಶಾಲೆ ಅಂದ ಮೇಲೆ ಎಲ್ಲಾ ಚಟುವಟಿಕೆಗಳು ಮಕ್ಕಳಿಗೆ ಮೀಸಲು ಅನ್ನುವುದರಲ್ಲಿ ಅನುಮಾನವೇ ಇಲ್ಲ, ಒಮ್ಮೆ ಶಿಕ್ಷಕರ ಜೊತೆಗೆ ಮುಖ್ಯೋಪಾಧ್ಯಾಯರು ಚರ್ಚಿಸಿದಾಗ ಅಡುಗೆ ಮನೆಯ ಕಡೆಗೆ ಏಕೆ ಮುಖ ಮಾಡಬಾರದು? ಒಂದು ತಂಡದಲ್ಲಿ 6 ಜನ ಸದಸ್ಯರನ್ನು ಸೇರಿಸಿ ಅಡುಗೆ ಸ್ಫರ್ಧೆಯನ್ನು ಏಕೆ ಆಯೋಜಿಸಬಾರದು? ಎಂಬ ಯೋಚನೆ ಬಂದಿತು. ಎಲ್ಲರ ಅನುಮೋದನೆ ಸಿಕ್ಕ ನಂತರದಲ್ಲಿ ಮುಂದಿನವಾರ ಶಾಲೆಯಲ್ಲಿ ಮಕ್ಕಳಿಗೆ "ಅಡುಗೆ ಸ್ಪರ್ಧೆ" ತಿಳಿಸಲಾಯಿತು. ಅಂದಿನಿಂದ ಅದೆಷ್ಟು ಲವಲವಿಕೆಯಿಂದ ಮಕ್ಕಳು ಓಡಾಟ ನಡೆಸುತ್ತಿದ್ದಾರೆ. ಗುಂಪಾಗಿ ಚರ್ಚೆಗಳು. ನಮಗೂ ಅದೇ ಮೊದಲ ಬಾರಿಯಾದ್ದರಿಂದ ಯಾವರೀತಿಯಲ್ಲಿ ಅನ್ನುವುದೊಂದು ಯೋಚನೆಯಾಗಿತ್ತು. ಅನೇಕ ಮಕ್ಕಳು ತಮ್ಮ ತಂಡದ ಮೆನು ಕಾರ್ಡ್ ನ್ನು ತಯಾರಿಸಿ ಅದರಲ್ಲಿ ತಮ್ಮ ತಂಡದಿಂದ ತಯಾರಿಸುವ 6 ತಿಂಡಿ/ತಿನಿಸುಗಳನ್ನು ತಿಳಿಸಿದ್ದರು. ಅದನ್ನು ನೋಡಿಯೇ ಹೊಟ್ಟೆ ತುಂಬುವ ಹಾಗಿತ್ತು. ಸಾಮಾನ್ಯವಾಗಿ ಹೆಣ್ಣು ಮಕ್ಕಳಿಗೆ ಅಡುಗೆ ಮನೆ ಹೆಚ್ಚು ಪರಿಚಯ. ಆದರೆ, ನಾವೇನು ಕಡಿಮೆ ಎನ್ನುವ...